ملک کا سب سے بڑا شکایتی نظام مکمل فعال

وزیرِ اعظم عمران خان کی ہدایت پر ملک کا سب سے بڑا شکایات کا نظام مکمل فعال کر دیا گیا ہے۔

شکایتی نظام کے تحت تمام صوبوں میں سٹیزن پورٹل پر افسران کے 8864 ڈیش بورڈز کو ذمے داری تفویض کی گئی ہے۔

اس ضمن میں وزیرِ اعظم آفس کی جانب سے ملک بھر کے 8864 سے زائد سرکاری دفاتر کو مراسلہ جاری کیا گیا ہے جس میں سرکاری افسران کو اپنےڈیش بورڈز سے کمزور طبقے کی شکایات درج کرنے کا حکم دیا گیا ہے۔

مراسلے میں بزرگ شہریوں، بیوہ خواتین اور معذور افراد کی سہولت کے لیے خصوصی ہدایات جاری کی گئی ہیں۔

وزیر ِاعظم عمران خان نے اس حوالے سے کہا ہے کہ حکومت کا منشور عوام کی عملی خدمت کرنا ہے، گورننس سسٹم کی بہتری عوام اور اداروں کے مابین بہتر راوبط سے مشروط ہے۔

وزیرِ اعظم عمران خان نے ہدایت کی ہے کہ سرکاری اداروں کو عوام کی خدمت کے لیے ہر صورت پابند بنایا جائے۔