کراچی، را کیلئے کام کرنیوالا اسپیشل برانچ پولیس کا افسر گرفتار

وفاقی تحقیقاتی ایجنسی (ایف آئی اے) کاؤنٹر ٹیررزم ونگ نے کراچی میں غیرملکی خفیہ نیٹ ورک کے خلاف کارروائی کرتے ہوئے را کے نیٹ ورک کے لیے سرگرم اسپیشل برانچ پولیس کا افسر گرفتار کر لیا ہے۔

وفاقی تحقیقاتی ایجنسی حکام کے مطابق اسپیشل برانچ پولیس افسر اے ایس آئی مصور نقوی بھارتی خفیہ ایجنسی را کے سلیپر سیل کا اہم رکن ہے، گرفتار ملزم کراچی ایئرپورٹ پر سرویلنس یونٹ میں ڈیوٹی کر رہا تھا۔

ایف آئی اے حکام کی جانب سے دعویٰ کیا گیا ہے کہ گرفتار ملزم کا تعلق ایم کیوایم لندن سے ہے۔

ایف آئی اے حکام کے مطابق گرفتار ملزم 1991ء میں سندھ پولیس میں بھرتی ہوا تھا، محمود صدیقی کی ہدایت پر ملزم کو رقم فراہم کی جاتی تھی، گرفتار ملزم سال 2008ء میں را نیٹ ورک کی ٹریننگ کے لیے انڈیا بھی جاچکا ہے۔

ایف آئی اے حکام کا کہنا ہے کہ ملزم ایئرپورٹ پر ساتھیوں کی آمدورفت میں سہولت کاری بھی کرتا تھا اور ٹارگٹ کلنگ، دہشت گردی کی کارروائیوں میں بھی ملوث رہا ہے۔

ایف آئی اے حکام کے مطابق کراچی پولیس کا ایک اے ایس آئی پہلے بھی اس نیٹ ورک کے لیے کام کرتے ہوئے گرفتار کیا جا چکا ہے، بھارتی خفیہ ایجنسی را کے 6 مبینہ ملزمان پہلے ہی گرفتار ہیں جبکہ گرفتار ملزمان سے تفتیش کے لیے جے آئی ٹی تحقیقات کر رہی ہے۔