اللہ کا شکر ہے پاکستان میں کورونا کنٹرول میں ہے

شیخ رشید احمد کہتے ہیں کہ اللہ تعالیٰ کا شکر ہے کہ پا کستان میں کورونا کنٹرول میں ہے۔

لاہور ریلوے اسٹیشن پر قلیوں اور ڈیلی ویجز ملازمین میں راشن تقسیم کرنے کی تقریب سے خطاب کرتے ہوئے وزیر ریلوے شیخ رشید احمد نے کہا کہ وزیرِ اعظم عمران خان نے پنجاب میں دفعہ 144 کے الزام میں پکڑے گئے تمام ملزمان چھڑوائے، وزیرِ اعلیٰ سندھ مراد علی شاہ بھی دفعہ 144 کے ملزمان چھوڑ دیں۔

شیخ رشید نے کہا کہ پاکستان میں کورونا کنٹرول میں ہے، امریکا اور یورپی ممالک فرانس، اٹلی کی طرح لوگ نہیں مر رہے، پاکستان پر اللہ تعالیٰ خاص کرم کرے گا۔

انہوں نے کہا کہ اللہ تعالیٰ ہی سے مانگیں،اللہ تعالیٰ ہی نےیہ وباختم کرنی ہے، غریب آدمی کو راشن مل رہا ہے، مسئلہ سفید پوش کا ہے، جو ہاتھ پھیلانا توہین سمجھتا ہے۔

وزیر ریلوے نے مزید کہا کہ وزیرِ اعظم عمران خان نے بین الاقوامی اداروں سے قرض معاف کرنے کی بات کی اور انہوں نے قرض ایک سال کے لیے ملتوی کرائے۔

آٹا چینی بحران کی تحقیقات کے حوالے سے بات کرتے ہوئےانھوں نے کہا کہ فرانزک رپورٹ آئے گی اور آئی پی پی، شوگر اور قرض معاف کرانے والے انجام کو پہنچیں گے۔