ملک میں کورونا مریض6506، ہلاکتیں 124

پاکستان میں کورونا وائرس کے مریضوں کی کُل تعداد 6 ہزار 506 ہو گئی، جبکہ 24 گھنٹوں میں کورونا کے مزید 17 مریض انتقال کر گئے جس کے بعد اس موذی وائرس سے انتقال کر جانے والوں کی کُل تعداد 124 ہو چکی ہے۔

ملک میں 4 ہزار 719 کورونا کے مریض اب بھی اسپتالوں میں زیرِ علاج ہیں، جن میں سے 39 کی حالت تشویش ناک ہے جبکہ 1 ہزار 645 مریض اللّٰہ تعالیٰ کے فضل و کرم سے اس بیماری سے صحت یاب ہو کر اپنے گھروں کو لوٹ چکے ہیں۔

پنجاب میں کورونا کے مریضوں کی تعداد سب سے زیادہ 3 ہزار 217 ہے جبکہ اس سے ہلاکتیں 34 ہو گئی ہیں۔

سندھ میں اب تک کورونا وائرس کے 1 ہزار 668 مریض سامنے آئے ہیں، جبکہ 41 مریض کورونا کے باعث جان کی بازی ہار چکے ہیں۔

خیبر پختون خوا میں کورونا کے مریضوں کی تعداد 912 ہو چکی ہے جبکہ اموات سب صوبوں سے زیادہ یعنی 42 ہیں۔

کورونا وائرس کے بلوچستان میں 281 مریض اب تک رپورٹ ہوئے ہیں جہاں 3 افراد اب تک اس مرض سے انتقال کر چکے ہیں۔

گلگت بلتستان میں 237 کورونا کے مریض سامنے آئے ہیں جبکہ اس سے 3 افراد جاں بحق ہوئے ہیں۔وفاقی دارالحکومت اسلام آباد میں 140 کورونا وائرس کے متاثرہ مریض ہیں جبکہ ایک شخص جاں بحق ہوا ہے۔

آزاد کشمیر میں کورونا کے اب تک 46 مریض رپورٹ ہوئے ہیں تاہم اللّٰہ تعالیٰ کے فضل و کرم سے یہاں اس وائرس سے اب تک کوئی ہلاکت سامنے نہیں ہوئی ہے۔

ملک بھرمیں گزشتہ 24 گھنٹوں میں کورونا وائرس کے 5 ہزار 540 ٹیسٹ کیے گئے جبکہ پاکستان میں اب تک 78 ہزار 979 افراد کے کورونا ٹیسٹ ہو چکے ہیں۔

متاثرہ افراد میں سے 58 فیصد میں کورونا وائرس مقامی طور پر منتقل ہوا ہے جبکہ 42 فیصد کی ٹریول ہسٹری ہے۔