ملک میں کورونا مریضوں کی تعداد 5038 ہوگئی، 86 افراد جاں بحق

اسلام آباد / کراچی: ملک بھر میں کورونا کے تصدیق شدہ مریضوں کی تعداد 5 ہزار 38 ہوگئی ہے جب کہ اس مہلک وائرس سے 86 افراد جاں بحق ہوچکے ہیں۔

وفاقی وزارت صحت کے کمانڈ اینڈ کنٹرول سینٹر کی جانب سے جاری کردہ اعداد و شمار کے مطابق ملک بھر میں گزشتہ 24 گھنٹوں کے دوران 2 ہزار 457 مشتبہ مریضوں کے ٹیسٹ کیے گئے جن میں سے 254 میں اس وائرس کی تشخیص ہوئی۔ جس کے بعد ملک بھر میں کورونا کا شکار افراد کی تعداد 5 ہزار 38 ہوگئی ہے جب کہ کورونا وائرس کےایک ہزار26مریض صحت یاب ہوگئے۔

ایک دن میں جانی نقصان
کمانڈ اینڈ کنٹرول سینٹر کی جانب سے جاری کردہ اعداد و شمار کے مطابق گزشتہ 24 گھنٹوں کے دوران ملک بھر میں 14 افراد اس وائرس کے ہاتھوں جان کی بازی ہار گئے ہیں جب کہ 37 کی حالت تشویشناک ہے۔

کہاں کہاں کتنے مریض ؟

حکام کے مطابق اب تک پنجاب میں 2425، سندھ 1318، بلوچستان 228، خیبر پختونخوا میں 697، آزاد کشمیر 35، اسلام آباد میں 119 اور گلگت بلتستان میں 216 کیسز رپورٹ ہوچکے ہیں۔

3 روز میں 16 ارب 58 کروڑ روپے تقسیم

ایکسپریس نیوز کو موصول ہونے والے اعداد و شمار کے مطابق گزشتہ 3 روز کے دوران 13 لاکھ 80 ہزار مستحق خاندانوں میں 16 ارب 58 کروڑ روہے تقسیم کئے گئے ہیں۔

کورونا کا دوسرا مرحلہ زیادہ خطرناک

انفیکشن کنٹرول سوسائٹی پاکستان کے صدر وپیتھالوجسٹ پروفیسر رفیق خانانی نے کہا ہے کہ کووڈ 19 وائرس کی ایک سے دوسروں میں منتقلی شدت اختیار کرنے لگی ہے۔ پاکستان میں اس وائرس کا دوسرا مرحلہ شدت سے بگڑتا ہوا نظر آرہا ہے۔ اگر عوام نے اس مرحلے کو سنجیدہ نہ لیا تو شدید تباہی ہوسکتی ہے۔