ایف آئی اے جعلی دفتر: نشاندہی کرنےوالے گواہان کو پولیس نے گرفتار کرلیا

کراچی میں ایف آئی اے کے جعلی دفتر اور ٹارچر سیل کی نشاندہی کرنا جرم بن گیا۔ دفتر کی نشاندہی کرنےوالے گواہان کو شاہراہ فیصل پولیس نے گرفتار کرلیا۔

پولیس کا کہنا ہے کہ دونوں گواہوں حمزہ اور حذیفہ کو خاتون کی شکایت پر شاہراہ فیصل پولیس نے گرفتار کیا ہے۔

پولیس کا کہنا ہے کہ خاتون نےحمزہ اور حذیفہ سمیت 3 افراد کےخلاف بلیک میلنگ کا مقدمہ درج کروایا ہے۔

ایف آئی اے حکام کا کہنا ہے کہ گواہوں کو مبینہ طور پر گواہی سے روکنے پر مقدمہ درج کیا گیا۔

حمزہ اور حذیفہ کی نشاندی پر ایف آئی اے سائبر سیل نے 6 دسمبر 2020ء کو سولجربازار میں چھاپہ ماراتھا، چھاپے کے دوران ایف آئی اے سائبر سیل کے جعلی دفتر اور ٹارچر سیل کی کا انکشاف ہوا تھا۔

جعلی دفتر چلانے والے خود کو ایف آئی اے اہلکار ظاہر کرکے شہریوں پر تشدد کرتے تھے، جبکہ جعلی دفتر سے تشدد کی متعدد فوٹیجز بھی ایف آئی اے نے تحویل میں لی تھیں جبکہ جعلی ایف آئی اے دفتر کیس میں حمزہ اورحذیفہ ایف آئی اے کےگواہان ہیں۔

ایف آئی اے کا کہنا ہے کہ مدعی خاتون گواہان کے خلاف کوئی بھی ثبوت دینے میں ناکام رہی تھی۔

ذرائع کا کہنا ہے کہ مدعی خاتون گواہان کےخلاف ہراساں کرنے کی شکایت ایف آئی اے سائبر سیل میں بھی دے چکی تھی جبکہ پولیس کا کہنا ہے کہ مقدمے کی تفتیش میرٹ پر کی جارہی ہے۔