وزیرِ اعظم مظفرآباد پہنچ گئے

وزیرِ اعظم پاکستان عمران خان آزاد کشمیر کے دارالحکومت مظفر آباد پہنچ گئے جہاں وہ وادیٔ نیلم کے برف باری اور برفانی تودوں کے گرنے سے متاثرہ علاقوں کا دورہ کریں گے۔

سی ایم ایچ مظفرآباد میں وزیرِ اعظم عمران خان نے برفانی تودے کی زد میں آکر زخمی ہونے والوں کی عیادت کی اور متاثرین سے ملاقات بھی کی۔

ادھر آزاد کشمیر کی وادیٔ نیلم میں برفانی تودے گرنے سے ہلاکتوں کی تعداد 73 ہوگئی ہے، متعدد افراد کے اب بھی ملبے تلے دبے ہونے کا خدشہ ہے۔

تودہ گرنے سے 22 دکانیں اور 91 مکان مکمل تباہ ہو گئے، 107 کو جزوی طور پر نقصان پہنچا ہے
پاک فوج اور سول انتظامیہ متاثرہ علاقوں میں امدادی کاموں میں مصروف ہیں، جبکہ ریاستِ آزاد کشمیر کی حکومت نے فوجی ہیلی کاپٹرز سے امدادی سامان متاثرہ علاقے میں پہنچا دیا ہے۔

اس سےقبل وزیرِ اعظم عمران خان کی معاونِ خصوصی برائے اطلاعات و نشریات ڈاکٹر فردوس عاشق اعوان نے ٹوئٹر کے ذریعے یہ بتایا تھا کہ وزیر اعظم عمران خان آزاد کشمیر کے دورے پر روانہ ہوئے ہیں جہاں وہ متاثرہ علاقوں کا دورہ کریں گے اور امدادی کاموں کا جائزہ بھی لیں گے۔