قرآن کی بے حرمتی، نارویجین سفیر دفتر خارجہ طلب

پاکستان نے ناروے میں قرآن مجید کی بے حرمتی کے واقعے پر تشویش کا اظہار کیا ہے۔

دفتر خارجہ نے مسلمانوں کے جذبات مجروح کرنے والے واقعے پر پاکستان میں تعینات ناروے کے سفیر کو طلب کرلیا ہے۔

ترجمان دفتر خارجہ کے مطابق نارویجین سفیر سےمطالبہ کیا گیا ہےکہ قرآن مجید کی بے حرمتی کے واقعے کے ذمے داروں کے خلاف کارروائی کی جائے۔

دفتر خارجہ کے مطابق نارویجین سفیر سے کہا گیا ہے کہ ناروے میں پیش آنے والے واقعے سے دنیا بھر کے 125 کروڑ مسلمانوں کے جذبات مجروح ہوئے ہیں۔

ترجمان دفتر خارجہ نے مزید کہا کہ سفیر پر واضح کردیا گیا ہے کہ آزادی اظہار رائے کے نام پر اس طرح کےاقدامات کو جواز نہیں بنایا جاسکتا۔

دفتر خارجہ نے یہ بھی کہا کہ مستقبل میں ایسے واقعات کی روک تھام کے لیے ناروے کے واقعے کے ذمہ داروں کو انصاف کے کٹہرے میں لایا جائے۔

ترجمان دفتر خارجہ کے مطابق اوسلو میں پاکستان کے سفیر کو نارویجین حکام تک پاکستان کے احتجاج اور گہری تشویش پہنچانے کی ہدایت کی گئی ہے۔