حکومت اقتدارکے مزے لوٹنے میں مصروف حکمرانوں کو عوام کی حالت زارپر توجہ دینے کیلئے فرصت تک نہیں

قومی وطن پارٹی کے صوبائی ڈپٹی جنرل سیکرٹری فضل رحمان نونو نے کہاہے کہ بدترین مہنگائی کے سبب غریب عوام کی قوت خرید جواب دے گئی اور وہ فاقہ کشی پر مجبورہوگئے مگر مرکزی اورصوبائی حکومت صرف تماشا دیکھ رہی ہے،انہیں عوام کی فکر ہے اور نہ ہی مہنگائی کے خاتمہ کیلئے کوئی پلا ن کرنے کا ارادہ رکھتی ہے،تین ماہ تک ڈاکٹروں نے ہڑتال کی مگرحکومت کو ان کے حال پر بھی ترس نہیں آیا،ڈینگی نے سردی کے موسم میں بھی سوات میں پنجے گاڑھ رکھے ہیں مگر حکومت پھر بھی سو رہی ہے،آخر ان بے چارے عوام کا کیابنے گا؟میڈیا سے گفتگو کرتے ہوئے انہوں نے کہاکہ اس وقت صوبے میں سبزی سے لے کر پھلوں اور روزمرہ استعمال ہونے والی دیگر اشیاء کے نرخ آسمان سے باتیں کررہے ہیں جس کی وجہ سے لوگوں کی قوت خرید ختم ہورہی ہے اور اگر یہ صورتحال مزید کچھ عرصہ تک اسی طرح برقراررہی تو لوگ فاقہ کشی پر مجبورہوجائیں گے، دوسری جانب ادویات کی قیمتوں میں بے تحاشہ اضافے اور گیس،بجلی پیٹرول کے بڑھتے ہوئے نرخوں نے رہی سہی کسرپوری کردی جس کے باعث عوامی مشکلات ا ورپریشانیوں میں اضافہ ہوا مگر صوبائی حکومت کو عوام کے حال پر ترس نہیں آتا اور اقتدارکے مزے لوٹنے میں مصروف حکمرانوں کو عوام کی حالت زارپر توجہ دینے کیلئے فرصت تک نہیں ملتی،انہوں نے کہاکہ ڈاکٹرحضرات اپنے جائز مطالبات کیلئے تقریباََ تین ماہ تک ہڑتال پر رہیں مگر حکومت کو ان کے حال پر بھی رحم نہیں آیا، ناقص پالیسیوں کے سبب زندگی کے تمام شعبوں سے تعلق رکھنے والے افراد حکومت سے مایوس نظر آرہے ہیں،انہوں نے کہاکہ حکومت کیلئے ڈوب مرنے کا مقام یہ بھی ہے کہ سردی کے اس موسم میں بھی سوات میں ڈینگی پل بڑھ رہاہے اور روزانہ کی بنیاد پر کئی کئی افراد میں وائرس کی موجودگی کی تصدیق ہورہی ہے تاہم حکومت وائرس کی روک تھام میں مکمل طورپر ناکام ہوگئی ہے،انہوں نے کہاکہ اگر حکومت کو اب بھی عوام کے حال پر ترس نہیں آیا تو وہ جلد سڑکوں کا رخ کرنے پر مجبورہوجائیں گے۔