مولانا کے مطالبے انارکی اور افرا تفری پھیلانے کیلئے ہیں، فواد چوہدری

وفاقی وزیر سائنس و ٹیکنالوجی فواد چوہدری کا کہنا ہے کہ مولانا فضل الرحمٰن کے مطالبے انارکی اور افرا تفری پھیلانے کے لیے ہیں، حکومت کوشش کرے گی معاملہ پر امن طریقے سے حل ہو جائے۔

جیو نیوز کے مارننگ شو جیو پاکستان میں گفتگو کرتے ہوئے فواد چوہدری نے کہا کہ پی ٹی آئی کا دھرنا الیکشن اصلاحات کے لیے تھا، جبکہ مولانا فضل الرحمٰن کے مارچ کی نوعیت مختلف ہے۔

فوادچوہدری نے کہا کہ مولانا فضل الرحمٰن کا مارچ شدت پسندوں کا ہے، مولانا کے مطالبے انارکی اور افرا تفری پھیلانے کے لیے ہیں۔

وفاقی وزیر کا کہنا تھا کہ وزیراعظم عمران خان کو صرف پارلیمنٹ کے ذریعے ہی ہٹایا جا سکتا ہے۔

فواد چوہدری نے بتایا کہ دھرنے کے شرکا کے پاس لٹھ بردار اور اے کے 47 بھی ہیں، حکومت کوشش کرے گی کہ معاملہ پر امن طریقے سے حل ہو۔

وفاقی وزیر کا کہنا تھا کہ نواز شریف، آصف زرداری اور دیگر قیادت کرپشن کے باعث جیل میں ہے، یہ چاہتے ہیں ملک میں انتشار رہے تاکہ ان پر سے توجہ ہٹی رہے۔